phenke hue sikkon ko uThaya nahin karte

pheñke hue sikkoñ ko uThāyā nahīñ karte

ḳhud.dār kabhī zarf kā saudā nahīñ karte

kuchh kaam baḌe ham ne kiye hote jahāñ meñ

yādoñ se tirī roz jo uljhā nahīñ karte

afsāna sunāte haiñ baḌe shauq se ham bhī

'unvān magar sab ko batāyā nahīñ karte

ummīd lagī hotī hai aa jāoge tum bhī

be-vaj.h to ham bazm sajāyā nahīñ karte

har lamha use saath liye phirte haiñ lekin

sachchā.ī se ham aañkh milāyā nahīñ karte

achchhā hai 'na'īm' aap kā ye tarz-e-‘amal bhī

har shaḳhs ko jo dil meñ basāyā nahīñ karte

phenke hue sikkon ko uThaya nahin karte

KHuddar kabhi zarf ka sauda nahin karte

kuchh kaam baDe hum ne kiye hote jahan mein

yaadon se teri roz jo uljha nahin karte

afsana sunate hain baDe shauq se hum bhi

'unwan magar sab ko bataya nahin karte

ummid lagi hoti hai aa jaoge tum bhi

be-wajh to hum bazm sajaya nahin karte

har lamha use sath liye phirte hain lekin

sachchai se hum aankh milaya nahin karte

achchha hai 'na'im' aap ka ye tarz-e-‘amal bhi

har shaKHs ko jo dil mein basaya nahin karte