phir aa gai ek but pe tabiat ko hua kya

phir aa ga.ī ik but pe tabī.at ko huā kyā

Taltī hī nahīñ sar se musībat ko huā kyā

mahrūm phir aayā dar-e-mai-ḳhāna se vaa.iz

rindān-e-qadah-ḳhvār kī himmat ko huā kyā

maqbūl-e-duā ho na asar āh-o-fuġhāñ meñ

is daur meñ tāsīr-e-mohabbat ko huā kyā

is husn-o-latāfat pe kyā sañg-dil aisā

hairat meñ huuñ allāh kī hikmat ko huā kyā

jaage to koī anjuman-e-ġhair meñ shab bhar

aur chhā.ī mire muñh pe nadāmat ko huā kyā

dānista naqāb ulTe hue haiñ sar-e-bāzār

aur us pe ye kahte haiñ ki ḳhilqat ko huā kyā

lo ham to chale kausar o tasnīm pe zāhid

tum yūñhī kahe jaao ki rahmat ko huā kyā

'mā.il' nahīñ kyā aur zamāne meñ ilāhī

mujh par hī utartī hai ye aafat ko huā kyā

phir aa gai ek but pe tabiat ko hua kya

Talti hi nahin sar se musibat ko hua kya

mahrum phir aaya dar-e-mai-KHana se waiz

rindan-e-qadah-KHwar ki himmat ko hua kya

maqbul-e-dua ho na asar aah-o-fughan mein

is daur mein tasir-e-mohabbat ko hua kya

is husn-o-latafat pe kya sang-dil aisa

hairat mein hun allah ki hikmat ko hua kya

jage to koi anjuman-e-ghair mein shab bhar

aur chhai mere munh pe nadamat ko hua kya

danista naqab ulTe hue hain sar-e-bazar

aur us pe ye kahte hain ki KHilqat ko hua kya

lo hum to chale kausar o tasnim pe zahid

tum yunhi kahe jao ki rahmat ko hua kya

'mail' nahin kya aur zamane mein ilahi

mujh par hi utarti hai ye aafat ko hua kya