phir aa gaya zaban pe wahi nam kya karen

phir aa gayā zabāñ pe vahī naam kyā kareñ

tū hī batā ai gardish-e-ayyām kyā kareñ

ik pal ko lab pe aa.ī hañsī phir palaT ga.ī

yaad aa gayā ho jaise koī kaam kyā kareñ

har aarzū ke hoñT zamāne ne sī diye

bujhne lagā charāġh sar-e-shām kyā kareñ

Dar hai ki tere haath se sāġhar na chhīn leñ

ham tishna-lab ai sāqī-e-gulfām kyā kareñ

aao musāfirān-e-adam aao ghar chaleñ

manzil hamārī duur hai ārām kyā kareñ

ruḳh par kalī ke jab paḌī tharrā ga.ī nazar

dekhā hai har bahār kā anjām kyā kareñ

'sīmāb' ham ko chain milegā na umr-bhar

ham to haiñ iztirāb meñ badnām kyā kareñ

phir aa gaya zaban pe wahi nam kya karen

tu hi bata ai gardish-e-ayyam kya karen

ek pal ko lab pe aai hansi phir palaT gai

yaad aa gaya ho jaise koi kaam kya karen

har aarzu ke honT zamane ne si diye

bujhne laga charagh sar-e-sham kya karen

Dar hai ki tere hath se saghar na chhin len

hum tishna-lab ai saqi-e-gulfam kya karen

aao musafiran-e-adam aao ghar chalen

manzil hamari dur hai aaram kya karen

ruKH par kali ke jab paDi tharra gai nazar

dekha hai har bahaar ka anjam kya karen

'simab' hum ko chain milega na umr-bhar

hum to hain iztirab mein badnam kya karen