phir aankhon se ojhal ho kar tu ne kaisa rup bhara

phir āñkhoñ se ojhal ho kar tū ne kaisā ruup bharā

chāroñ taraf be-rang havā.eñ tāroñ tak be-ant ḳhalā

lamhoñ kī mehmān thī goyā rishtoñ kī me.arāj yahāñ

vaqt se pahle sab kuchh dekhā vaqt paḌā to kuchh bhī na thā

dil ke sadaf se ubhrā motī nazroñ kā armān liye

duniyā ne aañsū kah Daalā jhaT palkoñ se TuuT girā

āvāzoñ ke is jangal meñ ḳhāmoshī kā peḌ kahāñ

sargoshī kā ruup dhaar le chhāñv meñ jis kī dil kī sadā

thaam havā kā dāman 'rāhī' aao ham bhī lāñgh chaleñ

lafzoñ ke pul bāñdh rahe haiñ koh-e-nidā se koh-e-nidā

phir aankhon se ojhal ho kar tu ne kaisa rup bhara

chaaron taraf be-rang hawaen taron tak be-ant KHala

lamhon ki mehman thi goya rishton ki mearaj yahan

waqt se pahle sab kuchh dekha waqt paDa to kuchh bhi na tha

dil ke sadaf se ubhra moti nazron ka arman liye

duniya ne aansu kah Dala jhaT palkon se TuT gira

aawazon ke is jangal mein KHamoshi ka peD kahan

sargoshi ka rup dhaar le chhanw mein jis ki dil ki sada

tham hawa ka daman 'rahi' aao hum bhi langh chalen

lafzon ke pul bandh rahe hain koh-e-nida se koh-e-nida