phir aas-pas se dil ho chala hai mera udas

phir ās-pās se dil ho chalā hai merā udaas

phir ek jaam ki barjā hoñ jis se hosh havās

hazār rañg sahī par nahīñ zarā bū-bās

havā-e-sahn-e-chaman ham ko aa.e kaise raas

sitāre ab bhī chamakte haiñ āsmāñ pe magar

nahīñ haiñ shomi-e-qismat se ham sitāra-shanās

khile haiñ phuul hazāroñ chaman ke dāman par

navā-garān-e-chaman ko magar nahīñ ehsās

dil-o-jigar meñ muravvat se paḌ ga.e nāsūr

hameñ nahīñ hai magar us ke phal se phir bhī yaas

ghire hue haiñ agar barq-o-bād-o-bārāñ meñ

to kyā huā ki kināre kī hai abhī tak aas

junūñ ko apne chhupā.eñ to kis tarah yaaro

ki taar taar hai is shaġhl-e-pāk kā akkās

jo bevafā.ī-e-gul se shikasta-ḳhātir ho

use batāo ki hai bā-vafā-tar us se ghaas

maiñ is sharāb-e-mohabbat se tañg huuñ 'arshī'

ki jitnā pīji.e baḌhtī hai aur utnī pyaas

phir aas-pas se dil ho chala hai mera udas

phir ek jam ki barja hon jis se hosh hawas

hazar rang sahi par nahin zara bu-bas

hawa-e-sahn-e-chaman hum ko aae kaise ras

sitare ab bhi chamakte hain aasman pe magar

nahin hain shomi-e-qismat se hum sitara-shanas

khile hain phul hazaron chaman ke daman par

nawa-garan-e-chaman ko magar nahin ehsas

dil-o-jigar mein murawwat se paD gae nasur

hamein nahin hai magar us ke phal se phir bhi yas

ghire hue hain agar barq-o-baad-o-baran mein

to kya hua ki kinare ki hai abhi tak aas

junun ko apne chhupaen to kis tarah yaro

ki tar tar hai is shaghl-e-pak ka akkas

jo bewafai-e-gul se shikasta-KHatir ho

use batao ki hai ba-wafa-tar us se ghas

main is sharab-e-mohabbat se tang hun 'arshi'

ki jitna pijie baDhti hai aur utni pyas