phir apna dil jalana paD raha hai

phir apnā dil jalānā paḌ rahā hai

ki pichhlā ġham purānā paḌ rahā hai

use ham se mohabbat ho ga.ī hai

hameñ us ko batānā paḌ rahā hai

jhukī nazroñ se ab jo chup khaḌe ho

kaho ab kyā chhupānā paḌ rahā hai

batāne ko jahāñ kī qadr-o-qīmat

ka.ī logoñ ko jaanā paḌ rahā hai

laḌā.ī vo ki ab apnā garebāñ

ḳhudī se ḳhud chhuḌānā paḌ rahā hai

tumhārā zikr chhiḌ jaane kā Dar hai

so bātoñ ko ghumānā paḌ rahā hai

chhupā kar dil meñ zaḳhm-e-hijr apnā

hameñ hañsnā hañsānā paḌ rahā hai

jahāñ rakh kar qadam uThnā thā ham ne

vahāñ us kā sirhānā paḌ rahā hai

mire raste ke saare jugnuoñ ko

mirī nazroñ meñ aanā paḌ rahā hai

zarā muhtāt rahnā rāste meñ

parindoñ kā Thikānā paḌ rahā hai

tire hote hue 'māham' falak ko

sitāroñ se sajānā paḌ rahā hai

phir apna dil jalana paD raha hai

ki pichhla gham purana paD raha hai

use hum se mohabbat ho gai hai

hamein us ko batana paD raha hai

jhuki nazron se ab jo chup khaDe ho

kaho ab kya chhupana paD raha hai

batane ko jahan ki qadr-o-qimat

kai logon ko jaana paD raha hai

laDai wo ki ab apna gareban

KHudi se KHud chhuDana paD raha hai

tumhaara zikr chhiD jaane ka Dar hai

so baaton ko ghumana paD raha hai

chhupa kar dil mein zaKHm-e-hijr apna

hamein hansna hansana paD raha hai

jahan rakh kar qadam uThna tha hum ne

wahan us ka sirhana paD raha hai

mere raste ke sare jugnuon ko

meri nazron mein aana paD raha hai

zara muhtat rahna raste mein

parindon ka Thikana paD raha hai

tere hote hue 'maham' falak ko

sitaron se sajaana paD raha hai