phir aur kya hai agar chashmak-e-sharar nahin

phir aur kyā hai agar chashmak-e-sharār nahīñ

bashar kī ziist kā duniyā meñ e.atibār nahīñ

sunā hai ham ne mohabbat hī meñ faqat hai qarār

magar ye kyā ki mohabbat ko ḳhud qarār nahīñ

kisī kī baat kā ab kaun e.atibār kare

ye dekh kar ki kisī kā kuchh e.atibār nahīñ

gunāhgār ko ai dosto burā na kaho

nahīñ bashar vo bashar jo gunāhgār nahīñ

hamāre dil meñ haiñ kai daaġh pūchhte kyā ho

koī hisāb nahīñ hai koī shumār nahīñ

hai jab se us kā tasavvur ye haal hai ki mujhe

ḳhizāñ kā ḳhauf nahīñ ḳhvāhish-e-bahār nahīñ

phir aur kya hai agar chashmak-e-sharar nahin

bashar ki zist ka duniya mein eatibar nahin

suna hai hum ne mohabbat hi mein faqat hai qarar

magar ye kya ki mohabbat ko KHud qarar nahin

kisi ki baat ka ab kaun eatibar kare

ye dekh kar ki kisi ka kuchh eatibar nahin

gunahgar ko ai dosto bura na kaho

nahin bashar wo bashar jo gunahgar nahin

hamare dil mein hain kai dagh puchhte kya ho

koi hisab nahin hai koi shumar nahin

hai jab se us ka tasawwur ye haal hai ki mujhe

KHizan ka KHauf nahin KHwahish-e-bahaar nahin