phir baDha josh-e-junun surat-e-sailab mujhe

phir baḌhā josh-e-junūñ sūrat-e-sailāb mujhe

phir kahīñ ġharq na kar de koī girdāb mujhe

maiñ vo huuñ aap jo ho apnī tabāhī kā sabab

kar ga.ī kasrat-e-girya mirī ġharqāb mujhe

chashm meñ ashk ḳhalish dil meñ jigar meñ Tīseñ

uf ye kyā chiiz kiyā kartī hai betāb mujhe

merī ummīd meñ hai yaas kī sūrat muzmar

merī hastī hai fanā misl-e-ḳhat-e-āb mujhe

nīchī nazreñ hoñ zabāñ band ho ġhairoñ ko salām

un kī mahfil ke to ā.eñge na ādāb mujhe

soz-e-furqat tapish-e-ġham ke sabab muddat se

ḳhvāb kyā ārzū-e-ḳhvāb huī ḳhvāb mujhe

shūmī-e-baḳht se tañg aa ke jo dariyā meñ girā

mauj ne pheñk diyā lā ke lab-e-āb mujhe

kitnā dil-soz hai 'tālib' tirā afsāna-e-ġham

vo to vo ġhair nazar aate haiñ betāb mujhe

phir baDha josh-e-junun surat-e-sailab mujhe

phir kahin gharq na kar de koi girdab mujhe

main wo hun aap jo ho apni tabahi ka sabab

kar gai kasrat-e-girya meri gharqab mujhe

chashm mein ashk KHalish dil mein jigar mein Tisen

uf ye kya chiz kiya karti hai betab mujhe

meri ummid mein hai yas ki surat muzmar

meri hasti hai fana misl-e-KHat-e-ab mujhe

nichi nazren hon zaban band ho ghairon ko salam

un ki mahfil ke to aaenge na aadab mujhe

soz-e-furqat tapish-e-gham ke sabab muddat se

KHwab kya aarzu-e-KHwab hui KHwab mujhe

shumi-e-baKHt se tang aa ke jo dariya mein gira

mauj ne phenk diya la ke lab-e-ab mujhe

kitna dil-soz hai 'talib' tera afsana-e-gham

wo to wo ghair nazar aate hain betab mujhe