phir ban-bas ka mausam aaya phir tahzib ke pankh jale

phir ban-bās kā mausam aaya phir tahzīb ke pankh jale

phir insān kī miTTī soī phir ban-mānus jaag uThe

jaane kitnī baar ye nagrī ġham kī aag meñ bhasm huī

phir bhī is pāshān-purī ke patthar barf-samān rahe

dekh ke ye zahrīlī fasleñ kyoñ itne hairān ho tum

tum ne hī to in khetoñ meñ nāgoñ ke phan bo.e the

is ko sāñpoñ se Dasvāo is pe bhayānak vaar karo

ye nagrī bedār na hogī ik bichchhū ke kaaTe se

o sanjīvnī laane vaalo ye tāḳhīr kā vaqt nahīñ

dard kī lanka chīḳh uThī hai zaḳhmoñ ke ambār tale

ā.ī-ga.īñ kitnī tahzībeñ is dhartī ke āñchal meñ

lekin haiñ ābād abhī tak saa.e būḌhe bargad ke

'nādāñ' vaqt ke hāthoñ āḳhir ḳhaak uḌī us Tiile kī

jis par baiTh ke us jogan ne jīvan ke vardān diye

phir ban-bas ka mausam aaya phir tahzib ke pankh jale

phir insan ki miTTi soi phir ban-manus jag uThe

jaane kitni bar ye nagri gham ki aag mein bhasm hui

phir bhi is pashan-puri ke patthar barf-saman rahe

dekh ke ye zahrili faslen kyon itne hairan ho tum

tum ne hi to in kheton mein nagon ke phan boe the

is ko sanpon se Daswao is pe bhayanak war karo

ye nagri bedar na hogi ek bichchhu ke kaTe se

o sanjiwni lane walo ye taKHir ka waqt nahin

dard ki lanka chiKH uThi hai zaKHmon ke ambar tale

aai-gain kitni tahziben is dharti ke aanchal mein

lekin hain aabaad abhi tak sae buDhe bargad ke

'nadan' waqt ke hathon aaKHir KHak uDi us Tile ki

jis par baiTh ke us jogan ne jiwan ke wardan diye