phir chand dinon se wo har shab KHwabon mein hamare aate hain

phir chand dinoñ se vo har shab ḳhvāboñ meñ hamāre aate haiñ

phir rāh-guzār-e-dil par kuchh qadmoñ ke nishāñ ham paate haiñ

kuchh raat ga.e kuchh raat rahe ham aksar ashk bahāte haiñ

kyā jaane aag lagāte haiñ yā dil kī aag bujhāte haiñ

ai dil ai ḳhushiyoñ ke madfan ai mere ġhamoñ ke tāj-mahal

le ḳhush ho terī ziyārat ko ehsās ke maare aate haiñ

is darja hue ham duniyā se bezār ki zikr-e-ġhair to kyā

ab ḳhud se gurezāñ haiñ aur apne saa.e se ghabrāte haiñ

mānūs haiñ ġham se kuchh aise gar niiñd meñ bhī ham ne 'arshad'

apne ko hañste dekh liyā to dekhte hī Dar jaate haiñ

phir chand dinon se wo har shab KHwabon mein hamare aate hain

phir rah-guzar-e-dil par kuchh qadmon ke nishan hum pate hain

kuchh raat gae kuchh raat rahe hum aksar ashk bahate hain

kya jaane aag lagate hain ya dil ki aag bujhate hain

ai dil ai KHushiyon ke madfan ai mere ghamon ke taj-mahal

le KHush ho teri ziyarat ko ehsas ke mare aate hain

is darja hue hum duniya se bezar ki zikr-e-ghair to kya

ab KHud se gurezan hain aur apne sae se ghabraate hain

manus hain gham se kuchh aise gar nind mein bhi hum ne 'arshad'

apne ko hanste dekh liya to dekhte hi Dar jate hain