phir faza mein koi zahrila dhuan bhar jaega

phir fazā meñ koī zahrīlā dhuāñ bhar jā.egā

phir kisī din apne andar kuchh na kuchh mar jā.egā

phailtā jaatā hai ye jo har-taraf ik shor sā

ek sannāTā kisī dahlīz par dhar jā.egā

yuuñ rahā to saare manzar bad-numā ho jā.eñge

ik bhayānak rañg har tasvīr meñ bhar jā.egā

kar rahā hai apnī bastī meñ jo ḳhushiyoñ kī talāsh

koī tīkhā dard apne saath le kar jā.egā

yuuñ achānak bhī huā kartā hai koī hādisa

mujh ko kyā ma.alūm thā vo is tarah mar jā.egā

chhā ga.ī nafrat kī gahrī dhuñd itnī duur tak

pyaar kā sūraj vahāñ tak kaun le kar jā.egā

rāh-rau ab tak khaḌe haiñ raah meñ is aas par

koī aa.egā idhar aur kuchh na kuchh kar jā.egā

phir faza mein koi zahrila dhuan bhar jaega

phir kisi din apne andar kuchh na kuchh mar jaega

phailta jata hai ye jo har-taraf ek shor sa

ek sannaTa kisi dahliz par dhar jaega

yun raha to sare manzar bad-numa ho jaenge

ek bhayanak rang har taswir mein bhar jaega

kar raha hai apni basti mein jo KHushiyon ki talash

koi tikha dard apne sath le kar jaega

yun achanak bhi hua karta hai koi hadisa

mujh ko kya malum tha wo is tarah mar jaega

chha gai nafrat ki gahri dhund itni dur tak

pyar ka suraj wahan tak kaun le kar jaega

rah-rau ab tak khaDe hain rah mein is aas par

koi aaega idhar aur kuchh na kuchh kar jaega