phir ghaalib ko yaad karen phir dida-e-tar ki baat karen

phir 'ġhālib' ko yaad kareñ phir dīda-e-tar kī baat kareñ

dil kī jigar kī baat kareñ phir saudā-e-sar kī baat kareñ

jab Tapkā thā ḳhūn-e-shahīdāñ jab mahkī thī arz-e-vatan

aao hamdam us lamhe kī us manzar kī baat kareñ

qātil to qātil Thahrā us ne jo kiyā so karnā thā

chārāgar ne kyoñ muñh pherā chārāgar kī baat kareñ

apne aap ko bhī pahchāneñ ḳhud se ta'āruf bhī kar leñ

apnī jin ko saar nahīñ vo duniyā-bhar kī baat kareñ

shab to 'kañval' har haal meñ hī kaT jaanī hai kaT jā.egī

kyoñ uljheñ tārīkī se phir kyoñ na sahar kī baat kareñ

phir 'ghaalib' ko yaad karen phir dida-e-tar ki baat karen

dil ki jigar ki baat karen phir sauda-e-sar ki baat karen

jab Tapka tha KHun-e-shahidan jab mahki thi arz-e-watan

aao hamdam us lamhe ki us manzar ki baat karen

qatil to qatil Thahra us ne jo kiya so karna tha

chaaragar ne kyon munh phera chaaragar ki baat karen

apne aap ko bhi pahchanen KHud se ta'aruf bhi kar len

apni jin ko sar nahin wo duniya-bhar ki baat karen

shab to 'kanwal' har haal mein hi kaT jaani hai kaT jaegi

kyon uljhen tariki se phir kyon na sahar ki baat karen