phir girani ki hai yalghaar KHuda KHair kare

phir girānī kī hai yalġhār ḳhudā ḳhair kare

baḌh ga.ī garmī-e-bāzār ḳhudā ḳhair kare

tang aa jā.eñge muflis to yaqīnan ik din

hoñge phir barsar-e-paikār ḳhudā ḳhair kare

kal talak jis ko na thā baat bhī karne kā shu.ūr

ab hai vo sāhab-e-guftār ḳhudā ḳhair kare

aaj phir luT ga.ī ismat kisī doshīza kī

surḳh hai surḳhi-e-aḳhbār ḳhudā ḳhair kare

jis ke dam se hameñ āzādī mayassar aa.ī

vo zabāñ ho ga.ī lāchār ḳhudā ḳhair kare

intiḳhābāt kā elaan huā hai jab se

hosh kho baiThe haiñ ashrār ḳhudā ḳhair kare

jin kī izzat thī baḌī mulk ke netāoñ meñ

vo bhī nikle haiñ siyahkār ḳhudā ḳhair kare

ham ko matlūb the 'bedār' vafādār magar

ham pe haavī haiñ riyā-kār ḳhudā ḳhair kare

phir girani ki hai yalghaar KHuda KHair kare

baDh gai garmi-e-bazar KHuda KHair kare

tang aa jaenge muflis to yaqinan ek din

honge phir barsar-e-paikar KHuda KHair kare

kal talak jis ko na tha baat bhi karne ka shuur

ab hai wo sahab-e-guftar KHuda KHair kare

aaj phir luT gai ismat kisi doshiza ki

surKH hai surKHi-e-aKHbar KHuda KHair kare

jis ke dam se hamein aazadi mayassar aai

wo zaban ho gai lachaar KHuda KHair kare

intiKHabaat ka elan hua hai jab se

hosh kho baiThe hain ashrar KHuda KHair kare

jin ki izzat thi baDi mulk ke netaon mein

wo bhi nikle hain siyahkar KHuda KHair kare

hum ko matlub the 'bedar' wafadar magar

hum pe hawi hain riya-kar KHuda KHair kare