phir is ke baad to tanhaiyon ke bich mein hain

phir is ke ba.ad to tanhā.iyoñ ke biich meñ haiñ

ki ġham kī TūTtī añgḌā.iyoñ ke biich meñ haiñ

ye shādyāne faqat sarḳhushī kā naam nahīñ

kisī kī chīḳheñ bhī shahnā.iyoñ ke biich meñ haiñ

hameñ to ḳhauf sā lāhaq hai TuuT jaane kā

ta.alluqāt jo gahrā.iyoñ ke biich meñ haiñ

ye jā.edād ye māl-o-matā'-o-mīrāseñ

fasād inhī pe mire bhā.iyoñ ke biich meñ haiñ

hamārā dard bhī ik sochne kā zāviya ek

ajiib naate ye sahrā.iyoñ ke biich meñ haiñ

kisī ko auj-e-surayyā pe le chale the magar

sila milā hai yahī khā.iyoñ ke biich meñ haiñ

ye dil kā shīsha to TukḌoñ meñ baT chukā kab kā

abhī talak terī ra.anā.iyoñ ke biich meñ haiñ

vafā hai kyā yahāñ mafhūm kis ko samjhā.eñ

yahī to dukh hai ki harjā.iyoñ ke biich meñ haiñ

bajā ye baat ki lāzim hai zabt 'hasrat' jī

magar ye āñkheñ ki purvā.iyoñ ke biich meñ haiñ

phir is ke baad to tanhaiyon ke bich mein hain

ki gham ki TuTti angDaiyon ke bich mein hain

ye shadyane faqat sarKHushi ka nam nahin

kisi ki chiKHen bhi shahnaiyon ke bich mein hain

hamein to KHauf sa lahaq hai TuT jaane ka

talluqat jo gahraiyon ke bich mein hain

ye jaedad ye mal-o-mata'-o-mirasen

fasad inhi pe mere bhaiyon ke bich mein hain

hamara dard bhi ek sochne ka zawiya ek

ajib nate ye sahraiyon ke bich mein hain

kisi ko auj-e-surayya pe le chale the magar

sila mila hai yahi khaiyon ke bich mein hain

ye dil ka shisha to TukDon mein baT chuka kab ka

abhi talak teri ranaiyon ke bich mein hain

wafa hai kya yahan mafhum kis ko samjhaen

yahi to dukh hai ki harjaiyon ke bich mein hain

baja ye baat ki lazim hai zabt 'hasrat' ji

magar ye aankhen ki purwaiyon ke bich mein hain