phir ji uThe hain jis se wo imkan tum nahin

phir jī uThe haiñ jis se vo imkān tum nahīñ

ab jo bhī kar rahā hai ye ehsān tum nahīñ

mujh meñ badal rahā hai jo ik ālam-e-ḳhayāl

us lamha-e-junūñ ke nigahbān tum nahīñ

bujhte hue charāġh kī lau jis ne tez kī

vo aur hī havā hai mirī jaan tum nahīñ

phir yuuñ huā ki jaise girah khul ga.ī koī

mushkil to bas yahī thī ki āsān tum nahīñ

tum ne sunī nahīñ hai sadā-e-shikast-e-dil

ham jhelte rahe haiñ ye nuqsān tum nahīñ

tum se to bas nibāh kī sūrat nikal paḌī

jis se hue the vaada o paimān tum nahīñ

ḳhush-fahmiyoñ kī baat alag hai magar ye ghar

jis ke liye sajā hai vo mehmān tum nahīñ

ye ālam-e-zuhūr hai hijrat-zada 'salīm'

ham bhī dukhī haiñ sirf pareshān tum nahīñ

phir ji uThe hain jis se wo imkan tum nahin

ab jo bhi kar raha hai ye ehsan tum nahin

mujh mein badal raha hai jo ek aalam-e-KHayal

us lamha-e-junun ke nigahban tum nahin

bujhte hue charagh ki lau jis ne tez ki

wo aur hi hawa hai meri jaan tum nahin

phir yun hua ki jaise girah khul gai koi

mushkil to bas yahi thi ki aasan tum nahin

tum ne suni nahin hai sada-e-shikast-e-dil

hum jhelte rahe hain ye nuqsan tum nahin

tum se to bas nibah ki surat nikal paDi

jis se hue the wada o paiman tum nahin

KHush-fahmiyon ki baat alag hai magar ye ghar

jis ke liye saja hai wo mehman tum nahin

ye aalam-e-zuhur hai hijrat-zada 'salim'

hum bhi dukhi hain sirf pareshan tum nahin