phir kuchh na banega jab mere ashkon mein lahu mil jaega

phir kuchh na banegā jab mere ashkoñ meñ lahū mil jā.egā

tum laakh sitamgar ho lekin dekhoge to dil hil jā.egā

go fikr-o-nazar kī rāhoñ par biThlā diye pahre duniyā ne

āzād haiñ ulfat kī rāheñ dil aa.egā dil jā.egā

chalte haiñ magar ai rāh-numā ik shart hamārī yaad rahe

ham pahuñcheñge pahle manzil par phir jāda-e-manzil jā.egā

ai sūd-o-ziyāñ ke matvāle arbāb-e-vafā ke saath na chal

ye tūfāñ tūfāñ guzreñge tū sāhil sāhil jā.egā

gar sabr na aaya taḌpūñgā fariyād karūñgā ro lūñgā

dil toḌne vaale ye to batā āḳhir tujhe kyā mil jā.egā

dīvāna sharīk-e-mahfil hai lekin ye ayaañ hai nazroñ se

begāna-e-mahfil aaya thā begāna-e-mahfil jā.egā

phir kuchh na banega jab mere ashkon mein lahu mil jaega

tum lakh sitamgar ho lekin dekhoge to dil hil jaega

go fikr-o-nazar ki rahon par biThla diye pahre duniya ne

aazad hain ulfat ki rahen dil aaega dil jaega

chalte hain magar ai rah-numa ek shart hamari yaad rahe

hum pahunchenge pahle manzil par phir jada-e-manzil jaega

ai sud-o-ziyan ke matwale arbab-e-wafa ke sath na chal

ye tufan tufan guzrenge tu sahil sahil jaega

gar sabr na aaya taDpunga fariyaad karunga ro lunga

dil toDne wale ye to bata aaKHir tujhe kya mil jaega

diwana sharik-e-mahfil hai lekin ye ayan hai nazron se

begana-e-mahfil aaya tha begana-e-mahfil jaega