phir lauT ke dharti pe bhi aane nahin deta

phir lauT ke dhartī pe bhī aane nahīñ detā

vo paañv ḳhalā meñ bhī jamāne nahīñ detā

ḳhush rahtā hai ujḌe hue logoñ se hamesha

basne nahīñ detā vo basāne nahīñ detā

manzūr nahīñ lamhoñ kī pahchān bhī us ko

aur naam daraḳhtoñ se miTāne nahīñ detā

detā hai masāfat bhī muhīb andhe kuoñ kī

yuuñ to vo kisī ko bhī ḳhazāne nahīñ detā

kahtā hai ki baaqī bhī rahe yaad safar kī

sauġhāt koī saath bhī laane nahīñ detā

basne bhī nahīñ detā mujhe apne nagar meñ

sahrā bhī magar mujh ko basāne nahīñ detā

maujoñ ke mujhe raaz bhī samjhātā nahīñ vo

sāhil pe safīna bhī lagāne nahīñ detā

de detā hai har baar vahī naav purānī

ḳhvāboñ ko samundar meñ bahāne nahīñ detā

patthar bhī mujhe hone nahīñ detā vo lekin

āñkhoñ meñ koī ḳhvāb sajāne nahīñ detā

phir lauT ke dharti pe bhi aane nahin deta

wo panw KHala mein bhi jamane nahin deta

KHush rahta hai ujDe hue logon se hamesha

basne nahin deta wo basane nahin deta

manzur nahin lamhon ki pahchan bhi us ko

aur nam daraKHton se miTane nahin deta

deta hai masafat bhi muhib andhe kuon ki

yun to wo kisi ko bhi KHazane nahin deta

kahta hai ki baqi bhi rahe yaad safar ki

saughat koi sath bhi lane nahin deta

basne bhi nahin deta mujhe apne nagar mein

sahra bhi magar mujh ko basane nahin deta

maujon ke mujhe raaz bhi samjhata nahin wo

sahil pe safina bhi lagane nahin deta

de deta hai har bar wahi naw purani

KHwabon ko samundar mein bahane nahin deta

patthar bhi mujhe hone nahin deta wo lekin

aankhon mein koi KHwab sajaane nahin deta