phir mujhko KHurshid-e-tamanna wala mausam de dena

phir mujh ko ḳhurshīd-e-tamannā vaalā mausam de denā

zaḳhm agar denā to apnī yaad kā marham de denā

dil kā aalam to sadiyoñ se ḳhushk jazīre jaisā hai

is sūkhī dhartī ko apne pyaar kā zamzam de denā

bāġh-e-tamannā kā har ġhuncha aas lagā.e baiThā hai

murjhāne se pahle in phūloñ ko shabnam de denā

ummīd-o-nā-ummīdī se ranj-o-ḳhushī se bālā-tar

ab jo agar denā to mujhe tum aisā aalam de denā

apnī kalā se pahle ugānā raag koī albelā sā

phir mere fan kī lahrātī us ko sargam de denā

khā jā.egā rafta rafta merā akelā-pan mujh ko

pahle soch samajh lenā phir apnā mātam de denā

phir mujh ko KHurshid-e-tamanna wala mausam de dena

zaKHm agar dena to apni yaad ka marham de dena

dil ka aalam to sadiyon se KHushk jazire jaisa hai

is sukhi dharti ko apne pyar ka zamzam de dena

bagh-e-tamanna ka har ghuncha aas lagae baiTha hai

murjhane se pahle in phulon ko shabnam de dena

ummid-o-na-ummidi se ranj-o-KHushi se baala-tar

ab jo agar dena to mujhe tum aisa aalam de dena

apni kala se pahle ugana rag koi albela sa

phir mere fan ki lahraati us ko sargam de dena

kha jaega rafta rafta mera akela-pan mujh ko

pahle soch samajh lena phir apna matam de dena