phir mujhe jine ki dua di hai

phir mujhe jiine kī duā dī hai

ya.anī phir ik hasīñ sazā dī hai

zulm sah kar bhī ham ne zālim ke

haath chūme haiñ aur duā dī hai

kyuuñ gila ho ki ham ko qudrat ne

ye kisī jurm kī sazā dī hai

shukriya tū ne ek Thokar se

rūh-e-ḳhvābīda ik jagā dī hai

husn ko kyā ḳhabar ki ḳhud us ne

sho.ala-e-ishq ko havā dī hai

mausam-e-gul ne aa ke gulshan meñ

jaane kyā aag sī lagā dī hai

ham ne dāġhoñ ke nuur se 'maġhmūm'

raunaq-e-bazm-e-dil baḌhā dī hai

phir mujhe jine ki dua di hai

yani phir ek hasin saza di hai

zulm sah kar bhi hum ne zalim ke

hath chume hain aur dua di hai

kyun gila ho ki hum ko qudrat ne

ye kisi jurm ki saza di hai

shukriya tu ne ek Thokar se

ruh-e-KHwabida ek jaga di hai

husn ko kya KHabar ki KHud us ne

shoala-e-ishq ko hawa di hai

mausam-e-gul ne aa ke gulshan mein

jaane kya aag si laga di hai

hum ne daghon ke nur se 'maghmum'

raunaq-e-bazm-e-dil baDha di hai