phir nae KHwab bunen phir nai rangat chahen

phir na.e ḳhvāb buneñ phir na.ī rañgat chāheñ

zinda rahne ke liye phir koī sūrat chāheñ

na.e mausam meñ kareñ phir se koī ahd-e-vafā

ishq karne ke liye aur bhī shiddat chāheñ

ek vo haiñ ki nazar bhar ke na dekheñ ham ko

ek ham haiñ ki faqat un kī hī sūrat chāheñ

baat sunñe ke liye hausla dil meñ rakkheñ

baat kahne ke liye harf-e-sadāqat chāheñ

un ko paane ke liye tesha-e-farhād baneñ

qais banñe ke liye qais sī vahshat chāheñ

saañs qurbān kareñ des pe ik din ham bhī

aisī taqdīr mile aisī sa.ādat chāheñ

ham mileñ aise ki joñ rañg mile paanī meñ

un kī qurbat meñ 'hasan' aisī rifāqat chāheñ

phir nae KHwab bunen phir nai rangat chahen

zinda rahne ke liye phir koi surat chahen

nae mausam mein karen phir se koi ahd-e-wafa

ishq karne ke liye aur bhi shiddat chahen

ek wo hain ki nazar bhar ke na dekhen hum ko

ek hum hain ki faqat un ki hi surat chahen

baat sunne ke liye hausla dil mein rakkhen

baat kahne ke liye harf-e-sadaqat chahen

un ko pane ke liye tesha-e-farhad banen

qais banne ke liye qais si wahshat chahen

sans qurban karen des pe ek din hum bhi

aisi taqdir mile aisi saadat chahen

hum milen aise ki jon rang mile pani mein

un ki qurbat mein 'hasan' aisi rifaqat chahen