phir pasina jabin se nikla

phir pasīna jabīn se niklā

saañp jab āstīn se niklā

laḌte laḌte hī mar ga.e saare

jab ḳhazāna zamīn se niklā

silsila apnī ḳhush-numā.ī kā

aap se ik hasīn se niklā

mujh ko hairat nahīñ huī kuchh bhī

dost jab hāsidīn se niklā

dhund phir chhaT ga.ī manāzir se

ḳhauf jab nāzirīn se niklā

log shak kar rahe the ġhairoñ par

ghar kā qissa makīn se niklā

manzileñ paas aa ga.iiñ chal kar

jab musāfir yaqīn se niklā

lafz-e-shohrat kā asl mā'nī to

ek gosha-nashīn se niklā

raaz donoñ ke thā jo sīnoñ meñ

aaj kaise vo tiin se niklā

phir pasina jabin se nikla

sanp jab aastin se nikla

laDte laDte hi mar gae sare

jab KHazana zamin se nikla

silsila apni KHush-numai ka

aap se ek hasin se nikla

mujh ko hairat nahin hui kuchh bhi

dost jab hasidin se nikla

dhund phir chhaT gai manazir se

KHauf jab nazirin se nikla

log shak kar rahe the ghairon par

ghar ka qissa makin se nikla

manzilen pas aa gain chal kar

jab musafir yaqin se nikla

lafz-e-shohrat ka asl ma'ni to

ek gosha-nashin se nikla

raaz donon ke tha jo sinon mein

aaj kaise wo tin se nikla