phir rah dikha mujhko ai mashrab-e-rindana

phir raah dikhā mujh ko ai mashrab-e-rindāna

kuchh bahs nahīñ is se ka.aba hai ki but-ḳhāna

ḳham hai na subūhī hai shīsha hai na paimāna

kyā jaane kahāñ ġham hai tābānī-e-mai-ḳhāna

is tarah bhī hotī hai tash.hīr-e-vafā aksar

phirtī hai sabā le kar ḳhākistar-e-parvāna

kī vus.at-e-sahrā kī qadmoñ ne pazīrā.ī

mujh sā na koī hogā shā.ista-e-vīrāna

har riñd-e-balā-kash par girtī hai sar-e-mahfil

barq-e-nigah-e-sāqī paimāna-ba-paimāna

irfān-e-talab kahiye yā tark-e-talab us ko

manzil kā shanāsā bhī manzil se hai begāna

kuchh ḳhār-e-chaman kā bhī ho zikr chaman-sāzo

ġhunchoñ kā bayāñ tā-kai afsāna-dar-afsāna

farzāngī-e-dil bhī kuchh chāhiye vahshat meñ

dīvāna sar-e-mahfil ban jaa.e na dīvāna

thī sham-e-farozāñ kī tarġhīb-e-jigar-sozī

yā aag meñ ḳhud apnī jal uTThā hai parvāna

asrār do-ālam ke khulte haiñ 'razā' dil par

takvīn-e-azal kā hai mahram dil-e-dīvāna

phir rah dikha mujh ko ai mashrab-e-rindana

kuchh bahs nahin is se kaba hai ki but-KHana

KHam hai na subuhi hai shisha hai na paimana

kya jaane kahan gham hai tabani-e-mai-KHana

is tarah bhi hoti hai tashhir-e-wafa aksar

phirti hai saba le kar KHakistar-e-parwana

ki wusat-e-sahra ki qadmon ne pazirai

mujh sa na koi hoga shaista-e-virana

har rind-e-bala-kash par girti hai sar-e-mahfil

barq-e-nigah-e-saqi paimana-ba-paimana

irfan-e-talab kahiye ya tark-e-talab us ko

manzil ka shanasa bhi manzil se hai begana

kuchh KHar-e-chaman ka bhi ho zikr chaman-sazo

ghunchon ka bayan ta-kai afsana-dar-afsana

farzangi-e-dil bhi kuchh chahiye wahshat mein

diwana sar-e-mahfil ban jae na diwana

thi sham-e-farozan ki targhib-e-jigar-sozi

ya aag mein KHud apni jal uTTha hai parwana

asrar do-alam ke khulte hain 'raza' dil par

takwin-e-azal ka hai mahram dil-e-diwana