phir rahi thi gali gali aawaz

phir rahī thī galī galī āvāz

kyā huī kis taraf ga.ī āvāz

merā shahr-e-sukūñ laraz uTThā

jaane kaisī thī vo na.ī āvāz

ḳhushbūoñ sī adā adā us kī

raushnī sī bikhertī āvāz

dil muḳhātab huā hai us kī taraf

mujh ko shāyad kisī ne dī āvāz

us ke ruḳhsār jaise sho.ala-e-gul

shahd kānoñ meñ gholtī āvāz

ek muddat ke baad zindāñ meñ

jaane kis kī ye guuñj uThī āvāz

tere qadmoñ kī chaap sun ke lagā

is se achchhī nahīñ koī āvāz

tere alfāz haiñ shanāḳht tirī

terī pahchān hai tirī āvāz

mere andar se boltā hai tū

mere hoñToñ pe hai tirī āvāz

dasht-e-ehsās meñ abhī abhī 'nūr'

aa.ī hai mujh ko DhūñDtī āvāz

phir rahi thi gali gali aawaz

kya hui kis taraf gai aawaz

mera shahr-e-sukun laraz uTTha

jaane kaisi thi wo nai aawaz

KHushbuon si ada ada us ki

raushni si bikherti aawaz

dil muKHatab hua hai us ki taraf

mujh ko shayad kisi ne di aawaz

us ke ruKHsar jaise shoala-e-gul

shahd kanon mein gholti aawaz

ek muddat ke baad zindan mein

jaane kis ki ye gunj uThi aawaz

tere qadmon ki chap sun ke laga

is se achchhi nahin koi aawaz

tere alfaz hain shanaKHt teri

teri pahchan hai teri aawaz

mere andar se bolta hai tu

mere honTon pe hai teri aawaz

dasht-e-ehsas mein abhi abhi 'nur'

aai hai mujh ko DhunDti aawaz