phir samaat ko bhi bhata hai rythm tartib se

phir samā.at ko bhī bhātā hai rythm tartīb se

ho agar us meñ tire lahje kā dam tartīb se

tujh se milte hī yuuñ khil jaate haiñ ham tartīb se

juuñ ho patjhaḌ meñ bahāroñ kā janam tartīb se

ek ik kar ke kareñge pesh sab farmā.isheñ

ya.anī Dhaa.e jā.eñge tum par sitam tartīb se

ho dil-e-muflis meñ ḳhūbāñ ko sukūñ kaise ki hai

lā-muhāla dhaḌkanoñ kā zer-o-bam tartīb se

yaar be-Dhanga chalan achchhā nahīñ hai ziist meñ

ham usūlī haiñ uThā.eñge qadam tartīb se

maut bar-haq to hai lekin ik qarīne kī tarah

ḳhud ko maiñ le kar gayā sū-e-adam tartīb se

juice chaa.e nāshta phir karte haiñ kuchh dauḌ-dhūp

jab amīrī ho to bhartā hai shikam tartīb se

rāste hamvār hote hī nahīñ mere liye

Thokareñ khā ke banā huuñ maiñ taham tartīb se

ahd-e-furqat chand aañsū aur hichkī maut kī

vaqt-e-ruḳhsat hai so nikle hai nasam tartīb se

zindagī meñ sirf bachpan ko muyassar hai sukūñ

phir javānī aur za.īfī haiñ alam tartīb se

chaar unsur yuuñ to haiñ taḳhlīq-e-insāñ meñ magar

pāñchvāñ dukh mujh meñ shāmil hai baham tartīb se

sab kī suntā thā kabhī rūdād 'alvī' shauq se

jhuuT sun sun ke banā hai ye asam tartīb se

phir samaat ko bhi bhata hai rythm tartib se

ho agar us mein tere lahje ka dam tartib se

tujh se milte hi yun khil jate hain hum tartib se

jun ho patjhaD mein bahaaron ka janam tartib se

ek ek kar ke karenge pesh sab farmaishen

yani Dhae jaenge tum par sitam tartib se

ho dil-e-muflis mein KHuban ko sukun kaise ki hai

la-muhaala dhaDkanon ka zer-o-bam tartib se

yar be-Dhanga chalan achchha nahin hai zist mein

hum usuli hain uThaenge qadam tartib se

maut bar-haq to hai lekin ek qarine ki tarah

KHud ko main le kar gaya su-e-adam tartib se

juice chae nashta phir karte hain kuchh dauD-dhup

jab amiri ho to bharta hai shikam tartib se

raste hamwar hote hi nahin mere liye

Thokaren kha ke bana hun main taham tartib se

ahd-e-furqat chand aansu aur hichki maut ki

waqt-e-ruKHsat hai so nikle hai nasam tartib se

zindagi mein sirf bachpan ko muyassar hai sukun

phir jawani aur zaifi hain alam tartib se

chaar unsur yun to hain taKHliq-e-insan mein magar

panchwan dukh mujh mein shamil hai baham tartib se

sab ki sunta tha kabhi rudad 'alwi' shauq se

jhuT sun sun ke bana hai ye asam tartib se