phir sar pe sham aa gai main raste mein hun

phir sar pe shaam aa ga.ī maiñ rāste meñ huuñ

ik ajnabī saḌak hai kisī hādse meñ huuñ

ik gard-bād hai mujhe hadd-e-nigāh tak

tanhā nahīñ huuñ dhūl-bhare qāfile meñ huuñ

tanhā.iyoñ ne phir tirā chehra pahan liyā

tere baġhair bhī maiñ tire dā.ere meñ huuñ

tū ne to mujh ko aks-e-muqayyad samajh liyā

thoḌī sī der aur tire aa.ine meñ huuñ

merā bhī zikr thā tire dil kī kitāb meñ

qirtās par nahīñ huuñ magar hāshiye meñ huuñ

sau saal mujh pe biite haiñ sūraj bujhe hue

sau saal jaisī raat se maiñ ratjage meñ huuñ

patthar kī mūrtī meñ hai sadiyoñ kā intizār

maiñ bhī asīr-e-jism huuñ aur faisle meñ huuñ

phir be-gharī kā ḳhauf havāoñ meñ ghul gayā

saat āsmān tere haiñ maiñ ghoñsle meñ huuñ

phir sar pe sham aa gai main raste mein hun

ek ajnabi saDak hai kisi hadse mein hun

ek gard-baad hai mujhe hadd-e-nigah tak

tanha nahin hun dhul-bhare qafile mein hun

tanhaiyon ne phir tera chehra pahan liya

tere baghair bhi main tere daere mein hun

tu ne to mujh ko aks-e-muqayyad samajh liya

thoDi si der aur tere aaine mein hun

mera bhi zikr tha tere dil ki kitab mein

qirtas par nahin hun magar hashiye mein hun

sau sal mujh pe bite hain suraj bujhe hue

sau sal jaisi raat se main ratjage mein hun

patthar ki murti mein hai sadiyon ka intizar

main bhi asir-e-jism hun aur faisle mein hun

phir be-ghari ka KHauf hawaon mein ghul gaya

sat aasman tere hain main ghonsle mein hun