phir se hasin waqt ki basti mein aa gae

phir se hasīn vaqt kī bastī meñ aa ga.e

mere tamām she'r jo surḳhī meñ aa ga.e

taqdīr sūkhe pattoñ kī bhī kyā hai dosto

thoḌe se charmarā.e ki muTThī meñ aa ga.e

ojhal hue nigāh se duniyā ke ranj-o-ġham

miTTī se ham bane the to miTTī meñ aa ga.e

guchchhe tumhārī yaad ke pahlū se TuuT kar

mahke hue gulāb kī Tahnī meñ aa ga.e

kaaTe ga.e haiñ peḌ yuuñ itne ki āj-kal

jangal ke saare jiiv bhī bastī meñ aa ga.e

phir se hasin waqt ki basti mein aa gae

mere tamam she'r jo surKHi mein aa gae

taqdir sukhe patton ki bhi kya hai dosto

thoDe se charmarae ki muTThi mein aa gae

ojhal hue nigah se duniya ke ranj-o-gham

miTTi se hum bane the to miTTi mein aa gae

guchchhe tumhaari yaad ke pahlu se TuT kar

mahke hue gulab ki Tahni mein aa gae

kaTe gae hain peD yun itne ki aaj-kal

jangal ke sare jiw bhi basti mein aa gae