phir shabab-o-sher ka charcha hua

phir shabāb-o-sher kā charchā huā

ek jashn-e-zindagī barpā huā

kārobār-e-zindagī phailā huā

umr kam aur vaqt hai uḌtā huā

ashk-hā-e-ġham kī tuġhyānī na pūchh

jaise dariyā josh par aaya huā

ātish-e-ġham se phaTā jaatā hai dil

par nazar aatā nahīñ jaltā huā

jaan kar bhī merī aamad kā sabab

pūchhte ho kis liye aanā huā

sar-ba-sajda haiñ ḳhudā ke sāmne

zulf-e-jānāñ meñ hai dil aTkā huā

dil meñ hangāme tamannāoñ ke haiñ

ġham haTā un kā ki sannāTā huā

ġhāliban ummīd-afzā hai javāb

hai lifāfa itr se mahkā huā

un ko manzil par pahuñchne kā yaqīñ

rāhbar jin kā hai ḳhud bhaTkā huā

tang-zarfoñ ko labālab jām-e-mai

rind ik ik buuñd ko tarsā huā

kar gayā ye kaun ḳhud ko sar-buland

kis kā sar hai daar par laTkā huā

jis jagah bhī aap ne rakkhā qadam

ik nayā fitna vahāñ paidā huā

zālimān-e-vaqt ne dekhā nahīñ

ḳhashmagīñ āñkhoñ meñ ḳhuun aaya huā

ho rahā hai nok-e-ḳhanjar se raqam

har fasāna ḳhuun meñ Duubā huā

dekh vo hai mard-e-maidān-e-hayāt

jī rahā hai maut se laḌtā huā

phir shabab-o-sher ka charcha hua

ek jashn-e-zindagi barpa hua

karobar-e-zindagi phaila hua

umr kam aur waqt hai uDta hua

ashk-ha-e-gham ki tughyani na puchh

jaise dariya josh par aaya hua

aatish-e-gham se phaTa jata hai dil

par nazar aata nahin jalta hua

jaan kar bhi meri aamad ka sabab

puchhte ho kis liye aana hua

sar-ba-sajda hain KHuda ke samne

zulf-e-jaanan mein hai dil aTka hua

dil mein hangame tamannaon ke hain

gham haTa un ka ki sannaTa hua

ghaaliban ummid-afza hai jawab

hai lifafa itr se mahka hua

un ko manzil par pahunchne ka yaqin

rahbar jin ka hai KHud bhaTka hua

tang-zarfon ko labaalab jam-e-mai

rind ek ek bund ko tarsa hua

kar gaya ye kaun KHud ko sar-buland

kis ka sar hai dar par laTka hua

jis jagah bhi aap ne rakkha qadam

ek naya fitna wahan paida hua

zaliman-e-waqt ne dekha nahin

KHashmagin aankhon mein KHun aaya hua

ho raha hai nok-e-KHanjar se raqam

har fasana KHun mein Duba hua

dekh wo hai mard-e-maidan-e-hayat

ji raha hai maut se laDta hua