phir siyah-posh hui sham nazar mein rakhna

phir siyah-posh huī shaam nazar meñ rakhnā

tum ye bedardī-e-ayyām nazar meñ rakhnā

maiñ ne bātil se kabhī sulh nahīñ kī logo

merī haq-goī kā in.aam nazar meñ rakhnā

ḳhuub hai dard-o-ġham-e-dil kā mudāvā lekin

ḳhud ko bhī ai dil-e-nākām nazar meñ rakhnā

Thokareñ khā ke sambhalte haiñ sambhalne vaale

ye jo patthar haiñ ba-har gaam nazar meñ rakhnā

imtihāñ-gāh-e-mohabbat se guzarne vaalo

roz-e-ā.shūra kā hañgām nazar meñ rakhnā

ka.aba-e-fan kī kashish khīñch rahī hai dil ko

fikr kab bāñdhegī ehrām nazar meñ rakhnā

intisāb-e-ġham-e-hastī ke liye ab ai 'nāz'

ḳhūb-sūrat sā koī naam nazar meñ rakhnā

phir siyah-posh hui sham nazar mein rakhna

tum ye bedardi-e-ayyam nazar mein rakhna

main ne baatil se kabhi sulh nahin ki logo

meri haq-goi ka inam nazar mein rakhna

KHub hai dard-o-gham-e-dil ka mudawa lekin

KHud ko bhi ai dil-e-nakaam nazar mein rakhna

Thokaren kha ke sambhalte hain sambhalne wale

ye jo patthar hain ba-har gam nazar mein rakhna

imtihan-gah-e-mohabbat se guzarne walo

roz-e-ashura ka hangam nazar mein rakhna

kaba-e-fan ki kashish khinch rahi hai dil ko

fikr kab bandhegi ehram nazar mein rakhna

intisab-e-gham-e-hasti ke liye ab ai 'naz'

KHub-surat sa koi nam nazar mein rakhna