phir tere hijr ke jazbaat ne angDai li

phir tire hijr ke jazbāt ne añgḌā.ī lī

thak ke din Duub gayā raat ne añgḌā.ī lī

jaise ik phuul meñ ḳhushbū kā diyā jaltā hai

us ke hoñToñ pe shikāyāt ne añgḌā.ī lī

surḳh hī surḳh hai is shahr kā manzar-nāma

amn hote hī fasādāt ne añgḌā.ī lī

ham bhī is jañg meñ filhāl kiye lete haiñ sulh

dekhā jā.egā jo hālāt ne añgḌā.ī lī

garmī-e-āh se nam ho ga.iiñ āñkheñ ai dost

baḌh gayā habs to barsāt ne añgḌā.ī lī

fāsla ranj-o-masarrat meñ bas ik saañs kā hai

muskurā.e the ki sadmāt ne añgḌā.ī lī

jhiil jaisī vo chamaktī huī āñkheñ 'tasnīm'

un meñ Duube the ki naġhmāt ne añgḌā.ī lī

phir tere hijr ke jazbaat ne angDai li

thak ke din Dub gaya raat ne angDai li

jaise ek phul mein KHushbu ka diya jalta hai

us ke honTon pe shikayat ne angDai li

surKH hi surKH hai is shahr ka manzar-nama

amn hote hi fasadat ne angDai li

hum bhi is jang mein filhaal kiye lete hain sulh

dekha jaega jo haalat ne angDai li

garmi-e-ah se nam ho gain aankhen ai dost

baDh gaya habs to barsat ne angDai li

fasla ranj-o-masarrat mein bas ek sans ka hai

muskurae the ki sadmat ne angDai li

jhil jaisi wo chamakti hui aankhen 'tasnim'

un mein Dube the ki naghmat ne angDai li