phir tere ochhe KHayalat ne dil toD diya

phir tire ochhe ḳhayālāt ne dil toḌ diyā

tanz meñ Duube ḳhitābāt ne dil toḌ diyā

lab-kushā.ī kī zarūrat thī to ḳhāmosh rahe

be-sabab ramz-o-ishārāt ne dil toḌ diyā

maiñ to ab lafz-e-mohabbat se laraz uThtā huuñ

terī is darja ināyāt ne dil toḌ diyā

maiñ samajhtā thā tire dil meñ makīñ huuñ lekin

tere andāz-e-mudārāt ne dil toḌ diyā

terī ġhazloñ meñ na.e daur ke uslūb nahīñ

tere farsūda ḳhayālāt ne dil toḌ diyā

mustaqil kaun tirā saath nibhā.egā yahāñ

ek do pal ke tire saath ne dil toḌ diyā

aap kī zaat se thī mujh ko tasallī kī umiid

aap ke ashkoñ kī barsāt ne dil toḌ diyā

vo mirā dost bhī ho saktā hai jaanī dushman

kyā batā.ūñ mire ḳhadshāt ne dil toḌ diyā

jin se ho jaatī hai īmān se duurī 'ajmal'

aise afkār-o-nazaryāt ne dil toḌ dayā

phir tere ochhe KHayalat ne dil toD diya

tanz mein Dube KHitabaat ne dil toD diya

lab-kushai ki zarurat thi to KHamosh rahe

be-sabab ramz-o-ishaaraat ne dil toD diya

main to ab lafz-e-mohabbat se laraz uThta hun

teri is darja inayat ne dil toD diya

main samajhta tha tere dil mein makin hun lekin

tere andaz-e-mudaraat ne dil toD diya

teri ghazlon mein nae daur ke uslub nahin

tere farsuda KHayalat ne dil toD diya

mustaqil kaun tera sath nibhaega yahan

ek do pal ke tere sath ne dil toD diya

aap ki zat se thi mujh ko tasalli ki umid

aap ke ashkon ki barsat ne dil toD diya

wo mera dost bhi ho sakta hai jaani dushman

kya bataun mere KHadshat ne dil toD diya

jin se ho jati hai iman se duri 'ajmal'

aise afkar-o-nazaryat ne dil toD daya