phir us nigah ka nashtar meri talash mein hai

phir us nigāh kā nashtar mirī talāsh meñ hai

sukūn-e-dil kā payambar mirī talāsh meñ hai

vo jis ne mujh ko kabhī aa.ine meñ dekhā thā

vo ek shaḳhs barābar mirī talāsh meñ hai

maiñ apnī zaat meñ bhaTkā huā musāfir huuñ

har ek raah kā patthar mirī talāsh meñ hai

ye zindagī kā añdherā ye karb-e-tanhā.ī

salīb-o-dār kā manzar mirī talāsh meñ hai

ba-nām-e-talḳhī-e-daurāñ ba-nām-e-zahr-e-hayāt

sunā hai phir koī sāġhar mirī talāsh meñ hai

sukūt-e-nāz ko andāz-e-guftugū de kar

kisī kī chashm-e-suḳhanvar mirī talāsh meñ hai

milā na chashma-e-haivāñ se jis ko āb-e-hayāt

nasīb kā vo sikandar mirī talāsh meñ hai

mujhe panāh de ai mere ġham kī tanhā.ī

umīd-o-bīm kā lashkar mirī talāsh meñ hai

maiñ 'badr' apne ujāle meñ ḳhud hī Duub gayā

tajallī-e-mah-o-aḳhtar mirī talāsh meñ hai

phir us nigah ka nashtar meri talash mein hai

sukun-e-dil ka payambar meri talash mein hai

wo jis ne mujh ko kabhi aaine mein dekha tha

wo ek shaKHs barabar meri talash mein hai

main apni zat mein bhaTka hua musafir hun

har ek rah ka patthar meri talash mein hai

ye zindagi ka andhera ye karb-e-tanhai

salib-o-dar ka manzar meri talash mein hai

ba-nam-e-talKHi-e-dauran ba-nam-e-zahr-e-hayat

suna hai phir koi saghar meri talash mein hai

sukut-e-naz ko andaz-e-guftugu de kar

kisi ki chashm-e-suKHanwar meri talash mein hai

mila na chashma-e-haiwan se jis ko aab-e-hayat

nasib ka wo sikandar meri talash mein hai

mujhe panah de ai mere gham ki tanhai

umid-o-bim ka lashkar meri talash mein hai

main 'badr' apne ujale mein KHud hi Dub gaya

tajalli-e-mah-o-aKHtar meri talash mein hai