phir wahi qatl-e-mohabbat-zadagan hai ki jo tha

phir vahī qatl-e-mohabbat-zadagāñ hai ki jo thā

rasan-o-dār kā aalam meñ samāñ hai ki jo thā

un ke hāthoñ meñ vahī teġh-e-sitam hai ki jo thī

dahr mātam-kada-e-be-gunahāñ hai ki jo thā

chashm-e-pur-ḳhūn-e-vafā lāla-nishāñ hai ki jo thī

qismat-e-bul-havasāñ aish-e-jahāñ hai ki jo thā

hairat-e-ahl-e-nazar ahl-e-hunar hai ki jo thī

shohra-e-kam-nazrāñ be-hunrāñ hai ki jo thā

rasm-e-ārā.ish-e-aivān-e-tarab hai ki jo thī

sar-e-farhād ye vo koh-e-girāñ hai ki jo thā

ye shajar haiñ ki salībeñ sī gaḌī haiñ har sū

manzil-e-ishq vahī sañg-e-nishāñ hai ki jo thā

daftar-e-lāla-o-gul hai na vo dīvān-e-bahār

zīnat-e-lauh-e-chaman harf-e-ḳhizāñ hai ki jo thā

zer-e-har-shāḳh shab-o-roz qafas Dhalte haiñ

ālam-e-nauha-garāñ basta-parāñ hai ki jo thā

daulat-e-ahl-e-talab ḳhār-e-sitam haiñ ki jo the

chaar sū ġhalġhala-e-gul-badanāñ hai ki jo thā

sāya-e-murġh-e-parīda hai ki ye abr-e-bahār

gila-e-marhamat-e-āh-e-tapāñ hai ki jo thā

hai vahī aaj bhī rañg-o-ravish-e-rūd-e-farāt

har nafas mātamī-e-tishna-labāñ hai ki jo thā

aaj bhī arz-e-vafā un pe girāñ hai ki jo thī

aaj bhī hausla-e-sharh-o-bayāñ hai ki jo thā

na vafāoñ pe nazar hai na jafāoñ kā malāl

dil meñ vo dard vo ehsās kahāñ hai ki jo thā

saulat-o-satvat-e-arbāb-e-hamam miT ke rahī

luT ke bhī husn-e-butāñ husn-e-butāñ hai ki jo thā

hai tirī yaad nashāt-e-shab-e-hijrāñ ki jo thī

haañ tirā dard qarār-e-dil-o-jāñ hai ki jo thā

jalva-e-yār se mahrūm hai ġham-ḳhāna-e-dil

ye vahī tīra-o-tārīk makāñ hai ki jo thā

vaqt ke saath badaltā nahīñ jāfar-'tāhir'

ye vahī soḳhta-dil soḳhta-jāñ hai ki jo thā

phir wahi qatl-e-mohabbat-zadagan hai ki jo tha

rasan-o-dar ka aalam mein saman hai ki jo tha

un ke hathon mein wahi tegh-e-sitam hai ki jo thi

dahr matam-kada-e-be-gunahan hai ki jo tha

chashm-e-pur-KHun-e-wafa lala-nishan hai ki jo thi

qismat-e-bul-hawasan aish-e-jahan hai ki jo tha

hairat-e-ahl-e-nazar ahl-e-hunar hai ki jo thi

shohra-e-kam-nazran be-hunran hai ki jo tha

rasm-e-araish-e-aiwan-e-tarab hai ki jo thi

sar-e-farhad ye wo koh-e-giran hai ki jo tha

ye shajar hain ki saliben si gaDi hain har su

manzil-e-ishq wahi sang-e-nishan hai ki jo tha

daftar-e-lala-o-gul hai na wo diwan-e-bahaar

zinat-e-lauh-e-chaman harf-e-KHizan hai ki jo tha

zer-e-har-shaKH shab-o-roz qafas Dhalte hain

aalam-e-nauha-garan basta-paran hai ki jo tha

daulat-e-ahl-e-talab KHar-e-sitam hain ki jo the

chaar su ghalghala-e-gul-badanan hai ki jo tha

saya-e-murgh-e-parida hai ki ye abr-e-bahaar

gila-e-marhamat-e-ah-e-tapan hai ki jo tha

hai wahi aaj bhi rang-o-rawish-e-rud-e-faraat

har nafas matami-e-tishna-laban hai ki jo tha

aaj bhi arz-e-wafa un pe giran hai ki jo thi

aaj bhi hausla-e-sharh-o-bayan hai ki jo tha

na wafaon pe nazar hai na jafaon ka malal

dil mein wo dard wo ehsas kahan hai ki jo tha

saulat-o-satwat-e-arbab-e-hamam miT ke rahi

luT ke bhi husn-e-butan husn-e-butan hai ki jo tha

hai teri yaad nashat-e-shab-e-hijran ki jo thi

han tera dard qarar-e-dil-o-jaan hai ki jo tha

jalwa-e-yar se mahrum hai gham-KHana-e-dil

ye wahi tira-o-tarik makan hai ki jo tha

waqt ke sath badalta nahin jafar-'tahir'

ye wahi soKHta-dil soKHta-jaan hai ki jo tha