phir yun hua ki aag se chehra jala diya

phir yuuñ huā ki aag se chehra jalā diyā

kis ne aziim shahr kā naqsha jalā diyā

kal panchhiyoñ ne qaid meñ ik faisle ke ba.ad

badle kī sard aag se piñjra jalā diyā

tāvān jo nahīñ milā shah-rag ko kaaT kar

bachche kī laash pheñk dī basta jalā diyā

āñdhī kī phir charāġh se takrār ho ga.ī

jugnū ne kyuuñ havā kā dupaTTa jalā diyā

jab nainvā meñ raat thī aur bujh ga.e charāġh

tab ashqiyā ne ḳhauf se ḳhema jalā diyā

ye gir rahī hai raakh jo 'rāhib' zamīn par

buḌhiyā ne raat chāñd meñ charḳha jalā diyā

phir yun hua ki aag se chehra jala diya

kis ne azim shahr ka naqsha jala diya

kal panchhiyon ne qaid mein ek faisle ke baad

badle ki sard aag se pinjra jala diya

tawan jo nahin mila shah-rag ko kaT kar

bachche ki lash phenk di basta jala diya

aandhi ki phir charagh se takrar ho gai

jugnu ne kyun hawa ka dupaTTa jala diya

jab nainwa mein raat thi aur bujh gae charagh

tab ashqiya ne KHauf se KHema jala diya

ye gir rahi hai rakh jo 'rahib' zamin par

buDhiya ne raat chand mein charKHa jala diya