phul barsae koi ya koi patthar phenke

phuul barsā.e koī yā koī patthar pheñke

shart itnī hai ki rusvā.ī se bach kar pheñke

maiñ ne to sirf ujāle kī kiran māñgī thī

tum ne kyoñ zahr meñ Duube hue ḳhanjar pheñke

ghar kī vīrānī se ghabrā ke nikal aa.e haiñ

raushnī koī darīche hī se andar pheñke

ho ga.ī ḳhud hī zamīñ-bos anā kī dīvār

tum ne kuchh phuul zamīñ se jo uThā kar pheñke

is tarah mujh ko 'atā kī ga.ī sahbā-e-hayāt

jis tarah ret pe kuchh jhaag samundar pheñke

apne ehsās kī chaTTān se zaḳhmī ho kar

ham ne bhī aaj 'sabā' tanz ke nashtar pheñke

phul barsae koi ya koi patthar phenke

shart itni hai ki ruswai se bach kar phenke

main ne to sirf ujale ki kiran mangi thi

tum ne kyon zahr mein Dube hue KHanjar phenke

ghar ki virani se ghabra ke nikal aae hain

raushni koi dariche hi se andar phenke

ho gai KHud hi zamin-bos ana ki diwar

tum ne kuchh phul zamin se jo uTha kar phenke

is tarah mujh ko 'ata ki gai sahba-e-hayat

jis tarah ret pe kuchh jhag samundar phenke

apne ehsas ki chaTTan se zaKHmi ho kar

hum ne bhi aaj 'saba' tanz ke nashtar phenke