phul hi phul hain daman-e-shakebai mein

phuul hī phuul haiñ dāmān-e-shakebā.ī meñ

aap jaa.eñ to zarā baat kī gahrā.ī meñ

kisī sannāTe kā imkān-e-ta'āqub bhī nahīñ

sāz-e-dil chheḌ diyā kartā huuñ tanhā.ī meñ

hairat-e-jalva-garī tujh ko patā ho shāyad

kis ne ā.īne jaḌe chashm-e-tamāshā.ī meñ

jalvatoñ ne to kabhī fursat-e-tāmīr na dī

zindagī zindagī ban jā.egī tanhā.ī meñ

aap kī yaad ke andāz-e-rifāqat kī qasam

maiñ akelā na rahā 'ālam-e-tanhā.ī meñ

maut ko dāḳhil-e-andāz-e-shifā-yābī kar

ik izāfa sahī e’jāz-e-masīhā.ī meñ

merā afsāna-e-ġham shauq se suniye lekin

talḳhiyāñ bhī to huā kartī haiñ sachchā.ī meñ

is ravish kā bhī maiñ shākī to nahīñ huuñ lekin

aap kuchh aur the āġhāz-e-shanāsā.ī meñ

kuchh 'ajab moḌ mirī ziist meñ aayā hai 'urūj'

maiñ na mahfil meñ sukūñ-yāb na tanhā.ī meñ

phul hi phul hain daman-e-shakebai mein

aap jaen to zara baat ki gahrai mein

kisi sannaTe ka imkan-e-ta'aqub bhi nahin

saz-e-dil chheD diya karta hun tanhai mein

hairat-e-jalwa-gari tujh ko pata ho shayad

kis ne aaine jaDe chashm-e-tamashai mein

jalwaton ne to kabhi fursat-e-tamir na di

zindagi zindagi ban jaegi tanhai mein

aap ki yaad ke andaz-e-rifaqat ki qasam

main akela na raha 'alam-e-tanhai mein

maut ko daKHil-e-andaz-e-shifa-yabi kar

ek izafa sahi e’jaz-e-masihai mein

mera afsana-e-gham shauq se suniye lekin

talKHiyan bhi to hua karti hain sachchai mein

is rawish ka bhi main shaki to nahin hun lekin

aap kuchh aur the aaghaz-e-shanasai mein

kuchh 'ajab moD meri zist mein aaya hai 'uruj'

main na mahfil mein sukun-yab na tanhai mein