phul ka paigham le jae koi mali ke nam

phuul kā paiġhām le jaa.e koī maalī ke naam

us sarāpā fasl-e-gul gulzār ke vaalī kā naam

maiñ bahādur-shah-e-'zafar' aur dard kā rañgūn hai

kyā likhūñ 'ġhālib' ke naam aur kyā likhūñ 'hālī' ke naam

sabza-e-begāna ho yā lāla-o-gul kī qabā

vaqf hai merā lahū gulshan kī hariyālī ke naam

likh rahā huuñ apne hāthoñ kī ḳharāshoñ kā salām

yaar ke dast-e-hinā.ī kī hasīñ laalī ke naam

ai nadīm-e-māh-o-anjum aa koī paiġhām de

pastiyoñ meñ Dagmagātī be-par-o-bālī ke naam

asl meñ sail-e-ḳhizāñ laatā hai paiġhām-e-bahār

har shagūfa har kalī har paat har Daalī ke naam

terā dīvāna 'hazīñ' mansūb kartā hai ba-shauq

ye ġhazal ai ishq terī fitrat-e-ālī ke naam

phul ka paigham le jae koi mali ke nam

us sarapa fasl-e-gul gulzar ke wali ka nam

main bahadur-shah-e-'zafar' aur dard ka rangun hai

kya likhun 'ghaalib' ke nam aur kya likhun 'haali' ke nam

sabza-e-begana ho ya lala-o-gul ki qaba

waqf hai mera lahu gulshan ki hariyali ke nam

likh raha hun apne hathon ki KHarashon ka salam

yar ke dast-e-hinai ki hasin lali ke nam

ai nadim-e-mah-o-anjum aa koi paigham de

pastiyon mein Dagmagati be-par-o-baali ke nam

asl mein sail-e-KHizan lata hai paigham-e-bahaar

har shagufa har kali har pat har Dali ke nam

tera diwana 'hazin' mansub karta hai ba-shauq

ye ghazal ai ishq teri fitrat-e-ali ke nam