phul KHushbu ya hawa hai fikr ki dahliz par

phuul ḳhushbū yā havā hai fikr kī dahlīz par

kaun dastak de rahā hai fikr kī dahlīz par

kashtiyāñ maujoñ se laḌ kar paar kab kī ho ga.iiñ

nāḳhudā ab tak khaḌā hai fikr kī dahlīz par

aaj phir maazī kī dhun par raqs hogā bazm meñ

aaj phir se ratjagā hai fikr kī dahlīz par

tum ne mujh ko ishq meñ ik din masīhā kyā kahā

dard kā jamghaT lagā hai fikr kī dahlīz par

lafz-o-ma.anī ke parindo shor itnā mat karo

ek aañsū so rahā hai fikr kī dahlīz par

ho rahī hai ruuh tak ik raushnī tahlīl sī

kyā kisī kā dil jalā hai fikr kī dahlīz par

shart thī har ek lab par mohr-e-ḳhāmoshī to phir

hashr sā kyūñkar bapā hai fikr kī dahlīz par

chāñd taare kahkashāñ raushan falak jugnū charāġh

shams bhī aakar paḌā hai fikr kī dahlīz par

ishq meñ aisā bhī maiñ ne vaqt dekhā hai 'shikhā'

zaḳhm ḳhud marham huā hai fikr kī dahlīz par

phul KHushbu ya hawa hai fikr ki dahliz par

kaun dastak de raha hai fikr ki dahliz par

kashtiyan maujon se laD kar par kab ki ho gain

naKHuda ab tak khaDa hai fikr ki dahliz par

aaj phir mazi ki dhun par raqs hoga bazm mein

aaj phir se ratjaga hai fikr ki dahliz par

tum ne mujh ko ishq mein ek din masiha kya kaha

dard ka jamghaT laga hai fikr ki dahliz par

lafz-o-mani ke parindo shor itna mat karo

ek aansu so raha hai fikr ki dahliz par

ho rahi hai ruh tak ek raushni tahlil si

kya kisi ka dil jala hai fikr ki dahliz par

shart thi har ek lab par mohr-e-KHamoshi to phir

hashr sa kyunkar bapa hai fikr ki dahliz par

chand tare kahkashan raushan falak jugnu charagh

shams bhi aakar paDa hai fikr ki dahliz par

ishq mein aisa bhi main ne waqt dekha hai 'shikha'

zaKHm KHud marham hua hai fikr ki dahliz par