phul ko aag duaon ko saza bhi kah dun

phuul ko aag duāoñ ko sazā bhī kah duuñ

aap kī zid hai to achchhoñ ko burā bhī kah duuñ

kam se kam itnā salīqa to milā sajdoñ se

koī me.aar pe utre to ḳhudā bhī kah duuñ

in zabānoñ kī to āvāz hī ghuT jaatī hai

dil agar bol rahā ho to sadā bhī kah duuñ

yuuñ to ik umr guzārī hai namak-dānoñ meñ

phuul zaḳhmoñ se jo barseñ to shifā bhī kah duuñ

āsmāñ saaf nazar aatā hai ghar kī chhat se

aise manzar ko na kyoñ arz-o-samā bhī kah duuñ

sabhī bāzār meñ lāThī pe khaḌe milte haiñ

koī chhoTā to mile jis ko baḌā bhī kah duuñ

āj-kal shahr meñ ye aam kahāvat hai 'riyāz'

jis ko īmān kahūñ us ko ḳhatā bhī kah duuñ

phul ko aag duaon ko saza bhi kah dun

aap ki zid hai to achchhon ko bura bhi kah dun

kam se kam itna saliqa to mila sajdon se

koi mear pe utre to KHuda bhi kah dun

in zabanon ki to aawaz hi ghuT jati hai

dil agar bol raha ho to sada bhi kah dun

yun to ek umr guzari hai namak-danon mein

phul zaKHmon se jo barsen to shifa bhi kah dun

aasman saf nazar aata hai ghar ki chhat se

aise manzar ko na kyon arz-o-sama bhi kah dun

sabhi bazar mein laThi pe khaDe milte hain

koi chhoTa to mile jis ko baDa bhi kah dun

aaj-kal shahr mein ye aam kahawat hai 'riyaz'

jis ko iman kahun us ko KHata bhi kah dun