phul se Dhalka hua os ka qatra hun main

phuul se Dhalkā huā os kā qatra huuñ maiñ

shāḳh se TuuT ke girtā huā pattā huuñ maiñ

chhoḌ ke chal diyā hai jaise badan hī mujh ko

jis kī pahchān nahīñ koī vo saaya huuñ maiñ

jo ki dar aayā thā rauzan se kiran ke hamrāh

tere kamre meñ vo be-fā.eda zarra huuñ maiñ

vādī-o-koh-o-bayābāñ se guzar kar āḳhir

shahr meñ aa ke jo kho jaa.e vo rasta huuñ maiñ

apnī āñkhoñ se nazar hī nahīñ aatā mujh ko

apne chehre ke liye aap hī parda huuñ maiñ

buujh ke aur adaq ho vo muamma huī tū

khul ke jo aur ulajh jaa.e vo uqda huuñ maiñ

ḳhud ujaḌ kar kiyā hai maiñ ne kisī ko ābād

naqsh meñ Dhal ke jo miT jaa.e vo jazba huuñ maiñ

mudda.ā hai ki mukammal karūñ taslīm use

kal jo kahtā thā tirī zaat kā hissa huuñ maiñ

'shaukat' is siine meñ mahsūs nahīñ ab vo bhī

dil ke baa.is kabhī da.avā thā ki zinda huuñ maiñ

phul se Dhalka hua os ka qatra hun main

shaKH se TuT ke girta hua patta hun main

chhoD ke chal diya hai jaise badan hi mujh ko

jis ki pahchan nahin koi wo saya hun main

jo ki dar aaya tha rauzan se kiran ke hamrah

tere kamre mein wo be-faeda zarra hun main

wadi-o-koh-o-bayaban se guzar kar aaKHir

shahr mein aa ke jo kho jae wo rasta hun main

apni aankhon se nazar hi nahin aata mujh ko

apne chehre ke liye aap hi parda hun main

bujh ke aur adaq ho wo muamma hui tu

khul ke jo aur ulajh jae wo uqda hun main

KHud ujaD kar kiya hai main ne kisi ko aabaad

naqsh mein Dhal ke jo miT jae wo jazba hun main

muddaa hai ki mukammal karun taslim use

kal jo kahta tha teri zat ka hissa hun main

'shaukat' is sine mein mahsus nahin ab wo bhi

dil ke bais kabhi dawa tha ki zinda hun main