phul us ka istiara tha kabhi

phuul us kā isti.ārā thā kabhī

rang-o-bū ko ik sahārā thā kabhī

bārisheñ kahtī haiñ biitā kal mirā

ye samandar pāra-pāra thā kabhī

vaqt ne kī ahmiyat kam vaqt kī

ye zarā sā kitnā saarā thā kabhī

chaar din bharpūr jī aur phir batā

kyā guzāre par guzārā thā kabhī

ab jo aayā hai maiñ us se kyā kahūñ

maiñ ne kis kis ko pukārā thā kabhī

aaj bhī jiitā huuñ bas ye soch kar

us ne sab kuchh mujh pe haarā thā kabhī

chhuT gayā sab kuchh par itnā yaad hai

kyā nahīñ thā kyā hamārā thā kabhī

kam-nazar har daur meñ kahte haiñ ye

kyā nazar thī kyā nazārā thā kabhī

aasrā paatā rahā jitnā 'amit'

kyā tū itnā be-sahārā thā kabhī

phul us ka istiara tha kabhi

rang-o-bu ko ek sahaara tha kabhi

barishen kahti hain bita kal mera

ye samandar para-para tha kabhi

waqt ne ki ahmiyat kam waqt ki

ye zara sa kitna sara tha kabhi

chaar din bharpur ji aur phir bata

kya guzare par guzara tha kabhi

ab jo aaya hai main us se kya kahun

main ne kis kis ko pukara tha kabhi

aaj bhi jita hun bas ye soch kar

us ne sab kuchh mujh pe haara tha kabhi

chhuT gaya sab kuchh par itna yaad hai

kya nahin tha kya hamara tha kabhi

kam-nazar har daur mein kahte hain ye

kya nazar thi kya nazara tha kabhi

aasra pata raha jitna 'amit'

kya tu itna be-sahaara tha kabhi