phūloñ ke rū-ba-rū thā sitāroñ ke sāmne
vo shaḳhs jal rahā thā hazāroñ ke sāmne
maiñ zaat ke ġhulām jazīre meñ qaid thā
charchā mirī anā kā thā yāroñ ke sāmne
chehre bahut hasīñ the magar dil bahut udaas
manzar dhuāñ dhuāñ the bahāroñ ke sāmne
bāteñ hamāre pyaar kī sho.ala-bayān thiiñ
tinkoñ ke āshiyāñ the sharāroñ ke sāmne
phir us kā zikr tak bhī nahīñ thā shumār meñ
jo shaḳhs chal rahā thā qatāroñ ke sāmne
ai chāñd mujh ko gahre samundar meñ le chalo
maiñ Dūbne lagā huuñ kināroñ ke sāmne
'shabnam' kisī kalī ke jigar meñ qiyām kar
kyoñ gir rahā hai vaqt ke ḳhāroñ ke sāmne
phulon ke ru-ba-ru tha sitaron ke samne
wo shaKHs jal raha tha hazaron ke samne
main zat ke ghulam jazire mein qaid tha
charcha meri ana ka tha yaron ke samne
chehre bahut hasin the magar dil bahut udas
manzar dhuan dhuan the bahaaron ke samne
baaten hamare pyar ki shoala-bayan thin
tinkon ke aashiyan the shararon ke samne
phir us ka zikr tak bhi nahin tha shumar mein
jo shaKHs chal raha tha qataron ke samne
ai chand mujh ko gahre samundar mein le chalo
main Dubne laga hun kinaron ke samne
'shabnam' kisi kali ke jigar mein qiyam kar
kyon gir raha hai waqt ke KHaron ke samne
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.