phulon ki baat dur tarasta hun Khaar ko

phūloñ kī baat duur tarastā huuñ ḳhaar ko

jī chāhtā hai aag lagā duuñ bahār ko

pattā koī bachā hai tire vāste batā

ab sar pe dhar ke naach chaman meñ bahār ko

kānoñ meñ tel Daal ke so.e paḌe haiñ log

kis ko dimāġh sun le kisī kī pukār ko

kohrām mach rahā hai gayā murdanī kā daur

chhā.e hue sukūt pe dekh intishār ko

ab chāhte haiñ puurī kahānī sunā.ūñ maiñ

karte the jo pasand faqat iḳhtisār ko

mere liye huā hai na hogā kabhī vo narm

rotā rahūñgā maiñ yūñhī parvardigār ko

mazmūn bāñdhtā hai suḳhan meñ na.e na.e

'kundan' baḌhā rahā hai ġhazal ke vaqār ko

phulon ki baat dur tarasta hun KHar ko

ji chahta hai aag laga dun bahaar ko

patta koi bacha hai tere waste bata

ab sar pe dhar ke nach chaman mein bahaar ko

kanon mein tel Dal ke soe paDe hain log

kis ko dimagh sun le kisi ki pukar ko

kohram mach raha hai gaya murdani ka daur

chhae hue sukut pe dekh intishaar ko

ab chahte hain puri kahani sunaun main

karte the jo pasand faqat iKHtisar ko

mere liye hua hai na hoga kabhi wo narm

rota rahunga main yunhi parwardigar ko

mazmun bandhta hai suKHan mein nae nae

'kundan' baDha raha hai ghazal ke waqar ko