phulon se mohabbat hai sab ko kanTon se kisi ko pyar nahin

phūloñ se mohabbat hai sab ko kāñToñ se kisī ko pyaar nahīñ

ḳhushiyoñ meñ zamāna sāthī hai ġham hoñ to koī ġham-ḳhvār nahīñ

faanī hai yahāñ kī har ik shai phir terī merī hastī kyā

duniyā pe bharosa kyā karnā duniyā kā koī me.aar nahīñ

har jor sitam manzūr unheñ har zulm gavāra hai un ko

phir bhī to tire dīvānoñ kī qismat meñ tirā dīdār nahīñ

ek ġham jo diyā hai tū ne mujhe vo umr kā hāsil hai merī

ab is ke alāva kuchh mujh ko matlūb nahīñ darkār nahīñ

kahne ko hamārī ġhazloñ meñ har lafz lahū kā qatra hai

alfāz magar alfāz nahīñ ash.ār magar ash.ār nahīñ

haiñ un se tasavvur meñ bāteñ yādoñ meñ munavvar haiñ rāteñ

maiñ kaise samajh luuñ siine meñ ḳhvābīda hai bedār nahīñ

phulon se mohabbat hai sab ko kanTon se kisi ko pyar nahin

KHushiyon mein zamana sathi hai gham hon to koi gham-KHwar nahin

fani hai yahan ki har ek shai phir teri meri hasti kya

duniya pe bharosa kya karna duniya ka koi mear nahin

har jor sitam manzur unhen har zulm gawara hai un ko

phir bhi to tere diwanon ki qismat mein tera didar nahin

ek gham jo diya hai tu ne mujhe wo umr ka hasil hai meri

ab is ke alawa kuchh mujh ko matlub nahin darkar nahin

kahne ko hamari ghazlon mein har lafz lahu ka qatra hai

alfaz magar alfaz nahin ashaar magar ashaar nahin

hain un se tasawwur mein baaten yaadon mein munawwar hain raaten

main kaise samajh lun sine mein KHwabida hai bedar nahin