phulon se suKHan mera sanwarne nahin pata

phūloñ se suḳhan merā sañvarne nahīñ paatā

sāġhar hai tamanna kā ki bharne nahīñ paatā

ik yaad hai aisī ki jo taḌpātī hai dil ko

ik zaḳhm hai aisā ki jo bharne nahīñ paatā

maiñ huuñ ki bhulāne ko tamanna karūñ us kī

vo hai ki mire dil se utarne nahīñ paatā

furqat ke ye lamhe bhī 'ajab kitne haiñ ai dost

maiñ marnā agar chāhūñ to marne nahīñ paatā

maiñ aage to baḌh aayā huuñ lekin ye mirā dil

ik shaḳhs kī yādoñ se ubharne nahīñ paatā

kartā huuñ maiñ vo jis kī tamanna nahīñ hotī

ho jis kī tamanna to vo karne nahīñ paatā

ik aag mire dil meñ dabī rahtī hai har din

ik diip hai mujh meñ ki nikharne nahīñ paatā

maiñ zard hue chehre se nālāñ nahīñ hargiz

ye chehra vahī hai jo mukarne nahīñ paatā

kuchh had se sivā ġham hai mirā aisā hai 'kāvish'

bin un ke mirā vaqt guzarne nahīñ paatā

phulon se suKHan mera sanwarne nahin pata

saghar hai tamanna ka ki bharne nahin pata

ek yaad hai aisi ki jo taDpati hai dil ko

ek zaKHm hai aisa ki jo bharne nahin pata

main hun ki bhulane ko tamanna karun us ki

wo hai ki mere dil se utarne nahin pata

furqat ke ye lamhe bhi 'ajab kitne hain ai dost

main marna agar chahun to marne nahin pata

main aage to baDh aaya hun lekin ye mera dil

ek shaKHs ki yaadon se ubharne nahin pata

karta hun main wo jis ki tamanna nahin hoti

ho jis ki tamanna to wo karne nahin pata

ek aag mere dil mein dabi rahti hai har din

ek dip hai mujh mein ki nikharne nahin pata

main zard hue chehre se nalan nahin hargiz

ye chehra wahi hai jo mukarne nahin pata

kuchh had se siwa gham hai mera aisa hai 'kawish'

bin un ke mera waqt guzarne nahin pata