phunk Dalegi ye ashkon ki sharar-bari mujhe

phūñk Dālegī ye ashkoñ kī sharar-bārī mujhe

raakh meñ kab tak dabā rakkhegī chingārī mujhe

tang mere jism par hai pārsā.ī kā libās

maar Dālegī kisī din ye riyā-kārī mujhe

bechtā huuñ apne fan-pāre khule bāzār meñ

kar ga.ī rusvā sar-e-bāzār nādārī mujhe

mere hisse meñ to ġhairoñ kī azā-dārī bhī hai

kab gavārā hogī apnoñ kī dil-āzārī mujhe

apnī bedārī kā ḳhud mujh ko yaqīñ aatā nahīñ

lag ga.ī hai āj-kal ḳhvāboñ kī bīmārī mujhe

apne hī dil kī gavāhī par kiyā thā e'tibār

kar ga.ī badnām ḳhud apnī taraf-dārī mujhe

vo sulūk-e-nāravā mujh se ba-nām-e-iltifāt

dostoñ kī yaad hai ab tak adākārī mujhe

phunk Dalegi ye ashkon ki sharar-bari mujhe

rakh mein kab tak daba rakkhegi chingari mujhe

tang mere jism par hai parsai ka libas

mar Dalegi kisi din ye riya-kari mujhe

bechta hun apne fan-pare khule bazar mein

kar gai ruswa sar-e-bazar nadari mujhe

mere hisse mein to ghairon ki aza-dari bhi hai

kab gawara hogi apnon ki dil-azari mujhe

apni bedari ka KHud mujh ko yaqin aata nahin

lag gai hai aaj-kal KHwabon ki bimari mujhe

apne hi dil ki gawahi par kiya tha e'tibar

kar gai badnam KHud apni taraf-dari mujhe

wo suluk-e-narawa mujh se ba-nam-e-iltifat

doston ki yaad hai ab tak adakari mujhe