phunk de ruh ki jaan de koi

phūñk de ruuh ki jaañ de koī

ḳhaak ko merī amaañ de koī

mere andar bhī to ik masjid hai

kabhī mujh meñ bhī azaañ de koī

jab tire saare pate haiñ farzī

phir sadā de to kahāñ de koī

maz.hab-e-ishq meñ sab jaa.ez hai

fatvā-e-sūd-o-ziyāñ de koī

log kahte haiñ ki ham zinda haiñ

zindagī kā to nishāñ de koī

sab taraf-dār haiñ sachchā.ī ke

itnā jhūTā na bayāñ de koī

lafz gūñge haiñ magar boleñge

shart itnī hai zabāñ de koī

donoñ aalam se mujhe kyā lenā

mujh ko merā hī jahāñ de koī

muntazir hashr ke kyoñ ho 'sālim'

haq agar hai to yahāñ de koī

phunk de ruh ki jaan de koi

KHak ko meri aman de koi

mere andar bhi to ek masjid hai

kabhi mujh mein bhi azan de koi

jab tere sare pate hain farzi

phir sada de to kahan de koi

mazhab-e-ishq mein sab jaez hai

fatwa-e-sud-o-ziyan de koi

log kahte hain ki hum zinda hain

zindagi ka to nishan de koi

sab taraf-dar hain sachchai ke

itna jhuTa na bayan de koi

lafz gunge hain magar bolenge

shart itni hai zaban de koi

donon aalam se mujhe kya lena

mujh ko mera hi jahan de koi

muntazir hashr ke kyon ho 'salim'

haq agar hai to yahan de koi