pi ke hum jam-e-sukun had se guzar to jaen

pī ke ham jām-e-sukūñ had se guzar to jaa.eñ

un ko paanā koī mushkil nahīñ mar to jaa.eñ

ye fazā-e-sahar-o-shām nikhar jā.egī

un kī zulfeñ mire hāthoñ se sañvar to jaa.eñ

chheḌte rahte haiñ hālāt ke nashtar har vaqt

varna zaḳhmoñ ke dahan aap hī bhar to jaa.eñ

naam tak shahr kā apne hameñ ab yaad nahīñ

kārvāñ raah meñ ham chhoḌ ke ghar to jaa.eñ

kaun kahtā hai ki hotī nahīñ ashkoñ kī zabāñ

log is bazm meñ bā-dīda-e-tar to jaa.eñ

duur rah kar vo mujhe yaad bhī kyoñ aate haiñ

phuul shāḳhoñ se judā ho ke bikhar to jaa.eñ

ḳhuld-e-dil ḳhuld-e-nazar duur nahīñ hai 'shādāñ'

haath apne kabhī tā-parda-e-dar to jaa.eñ

pi ke hum jam-e-sukun had se guzar to jaen

un ko pana koi mushkil nahin mar to jaen

ye faza-e-sahar-o-sham nikhar jaegi

un ki zulfen mere hathon se sanwar to jaen

chheDte rahte hain haalat ke nashtar har waqt

warna zaKHmon ke dahan aap hi bhar to jaen

nam tak shahr ka apne hamein ab yaad nahin

karwan rah mein hum chhoD ke ghar to jaen

kaun kahta hai ki hoti nahin ashkon ki zaban

log is bazm mein ba-dida-e-tar to jaen

dur rah kar wo mujhe yaad bhi kyon aate hain

phul shaKHon se juda ho ke bikhar to jaen

KHuld-e-dil KHuld-e-nazar dur nahin hai 'shadan'

hath apne kabhi ta-parda-e-dar to jaen