pi raha hun ki haqiqat ye faramosh nahin

pī rahā huuñ ki haqīqat ye farāmosh nahīñ

ahl-e-dil ke liye ik hādisa hai hosh nahīñ

nigah-o-dil se mire bach ke samā jā mujh meñ

maiñ ḳhud āġhosh huuñ merā koī āġhosh nahīñ

na haTā sāġhar-e-gul-rang laboñ se mere

tujh ko to hosh hai saaqī jo mujhe hosh nahīñ

sach to ye hai nigah-e-nāz tire sar kī qasam

miT ke bhī dil tire ehsāñ se subuk-dosh nahīñ

aaj samjhā tirī mastāna nigāhoñ ke nisār

hosh kahte haiñ jise asl meñ vo hosh nahīñ

mere āġhosh-e-mohabbat meñ na aane vaale

kyā hai duniyā agar āġhosh hī āġhosh nahīñ

kab nahīñ dil meñ mire kashmakash-e-vasl-o-firāq

kab vo āġhosh meñ begāna-e-āġhosh nahīñ

vo bhī chāheñ to judā ho nahīñ sakte 'bāsit'

dil mirā dil hai kisī aur kā āġhosh nahīñ

pi raha hun ki haqiqat ye faramosh nahin

ahl-e-dil ke liye ek hadisa hai hosh nahin

nigah-o-dil se mere bach ke sama ja mujh mein

main KHud aaghosh hun mera koi aaghosh nahin

na haTa saghar-e-gul-rang labon se mere

tujh ko to hosh hai saqi jo mujhe hosh nahin

sach to ye hai nigah-e-naz tere sar ki qasam

miT ke bhi dil tere ehsan se subuk-dosh nahin

aaj samjha teri mastana nigahon ke nisar

hosh kahte hain jise asl mein wo hosh nahin

mere aaghosh-e-mohabbat mein na aane wale

kya hai duniya agar aaghosh hi aaghosh nahin

kab nahin dil mein mere kashmakash-e-wasl-o-firaq

kab wo aaghosh mein begana-e-aghosh nahin

wo bhi chahen to juda ho nahin sakte 'basit'

dil mera dil hai kisi aur ka aaghosh nahin