pite hain usi ja baada-e-gham maKHmur jahan se hote hain

piite haiñ usī jā bāda-e-ġham maḳhmūr jahāñ se hote haiñ

rāhat bhī vahīñ se miltī hai ranjūr jahāñ se hote haiñ

is jazb-e-mohabbat ke sadqe is jazba-e-dil kā kyā kahnā

muḳhtār vahīñ ban jaate haiñ majbūr jahāñ se hote haiñ

mahsūs kuchh aisā hotā hai ġham apnā muqaddar hai shāyad

milte haiñ hazāroñ dard vahīñ masrūr jahāñ se hote haiñ

ab rasm-e-taġhāful rahne do ab paas hamāre aa jaao

ye vaqt ġhanīmat hai dekho ham duur jahāñ se hote haiñ

ye rang-e-tasavvur kyā kahiye duniyā-e-taḳhayyul jannat hai

nazdīk unheñ paatā huuñ bahut vo duur jahāñ se hote haiñ

kyā parda hai un kā parda bhī ye chāñd ye taare dekho to

din-rāt nigāhoñ meñ rah kar mastūr jahāñ se hote

dekhe to 'vakīl' aakar koī gumrāhī-e-manzil kā aalam

manzil vo bhaTaktī phirtī hai ham duur jahāñ se hote haiñ

pite hain usi ja baada-e-gham maKHmur jahan se hote hain

rahat bhi wahin se milti hai ranjur jahan se hote hain

is jazb-e-mohabbat ke sadqe is jazba-e-dil ka kya kahna

muKHtar wahin ban jate hain majbur jahan se hote hain

mahsus kuchh aisa hota hai gham apna muqaddar hai shayad

milte hain hazaron dard wahin masrur jahan se hote hain

ab rasm-e-taghaful rahne do ab pas hamare aa jao

ye waqt ghanimat hai dekho hum dur jahan se hote hain

ye rang-e-tasawwur kya kahiye duniya-e-taKHayyul jannat hai

nazdik unhen pata hun bahut wo dur jahan se hote hain

kya parda hai un ka parda bhi ye chand ye tare dekho to

din-raat nigahon mein rah kar mastur jahan se hote

dekhe to 'wakil' aakar koi gumrahi-e-manzil ka aalam

manzil wo bhaTakti phirti hai hum dur jahan se hote hain