pilaya usne jab se sharbat-e-didar chuTki mein

pilāyā us ne jab se sharbat-e-dīdār chuTkī meñ

numāyāñ haiñ tabhī se ishq ke āsār chuTkī meñ

ḳhizāñ-dīda thā us se pahle merā gulshan-e-hastī

mirā bāġh-e-tamannā ho gayā gulzār chuTkī meñ

kiyā arz-e-tamannā maiñ ne jab vo hañs ke ye bole

nahīñ karte kisī se ishq kā iz.hār chuTkī meñ

tumhārī ik nigāh-e-nāz ke sadqe meñ ai jānāñ

hue haiñ ḳham na jaane kitne hī sardār chuTkī meñ

gayā vo daur jab farhād chaTTānoñ se laḌtā thā

magar ab chāhte haiñ sab ye pā leñ pyaar chuTkī meñ

namāz-o-roza kī talqīñ guzartī hai garāñ us par

magar shopping ko ho jaatī hai vo tayyār chuTkī meñ

hamāre rahnumāoñ ke ajab atvār haiñ armāñ

kabhī inkār chuTkī meñ kabhī iqrār chuTkī meñ

pilaya us ne jab se sharbat-e-didar chuTki mein

numayan hain tabhi se ishq ke aasar chuTki mein

KHizan-dida tha us se pahle mera gulshan-e-hasti

mera bagh-e-tamanna ho gaya gulzar chuTki mein

kiya arz-e-tamanna main ne jab wo hans ke ye bole

nahin karte kisi se ishq ka izhaar chuTki mein

tumhaari ek nigah-e-naz ke sadqe mein ai jaanan

hue hain KHam na jaane kitne hi sardar chuTki mein

gaya wo daur jab farhad chaTTanon se laDta tha

magar ab chahte hain sab ye pa len pyar chuTki mein

namaz-o-roza ki talqin guzarti hai garan us par

magar shopping ko ho jati hai wo tayyar chuTki mein

hamare rahnumaon ke ajab atwar hain arman

kabhi inkar chuTki mein kabhi iqrar chuTki mein